சிராஜுக்கு பலமே அவரது இன் ஸ்விங் பந்துதான். வலது கை பேட்டர்களுக்கு ஒரே லைன், லெந்தில் தொடர்ந்து ஆஃப் திசையில் பந்துவீசும் இவர், திடீரென்று ஒரு ஆப் திசை பந்தை, இன் ஸ்விங் செய்துவிடுவதால், அதைக் கண்டுபிடிக்க முடியாமல், பேட்டர்கள் போல்ட் அல்லது LBW ஆகிவிடுகிறார்கள்.
சிராஜ் முதலிடம்:
இவர் சமீபத்தில் இலங்கைக்கு எதிரான ஒருநாள் தொடரில் 9 விக்கெட்களை வீழ்த்திய நிலையில், அதனைத் தொடர்ந்து நியூசிலாந்துக்கு எதிரான முதல் ஒருநாள் போட்டியில் 4 விக்கெட்களை கைப்பற்றி அசத்தினார். இப்படி தொடர்ந்து அபாரமாக பந்துவீசியதால்தான், 729 புள்ளிகளை பெற்று முதலிடத்தை பிடித்துள்ளார். ஹேசில்வுட் 727 புள்ளிகளைப் பெற்று இரண்டாவது இடத்தில் உள்ளார். டிரென்ட் போல்ட் மூன்றாவது இடத்தில் உள்ளார்.
சுப்மன் கில் முன்னேற்றம்:
இந்திய அணி கேப்டன் ரோஹித் ஷர்மா, 10ஆவது இடத்தில் இருந்து 8ஆவது இடத்திற்கு முன்னேறியுள்ளார். அதேபோல், சுப்மன் கில் 26ஆவது இடத்தில் இருந்த நிலையில், நியூசிலாந்துக்கு எதிராக இரட்டை சதம், சதம் அடித்து (360 ரன்கள்) அதிரடியாக 6ஆவது இடத்தை பிடித்துள்ளார். கோலி 7ஆவது இடத்தில் உள்ளார்.
இதற்குமுன், கில் இலங்கை தொடரிலும் அபாரமாக விளையாடி 3 போட்டிகளில் 207 ரன்களை சேர்த்திருந்தார். அதாவது கடந்த 6 ஒருநாள் போட்டிகளில் 567 ரன்களை குவித்து வியக்க வைத்திருக்கிறார்.
